لو عاوز ترسم لوحه
فده شىء موش صعب
هتشخبط شطين للميه
وهتركن جواها العفن الطالع
وتميل نخله .. ساقطه سعانفها
لكإنها تتخانق
مع هبة ريح
ع الجنب التانى
بيوت على منظر أصغر
بتدارى .. جبال
ومخيم
ومخيم فوقها سحابه
وكام طياره
من نوع الإف الستاشر
تقدر وانت مغمس ريشتك
باللون الداكن
ترمى على الأرض .. قتيل .. اتنين
أو حتى على قد م تقدر
تقدر تعملك كام حاجز
لكإن مدينه محاصره
ترجع للجنب اللى إنت متخايله قدامك
وتطير ف حمام السلم المربوط جناحاته
على خصر البنت العريانه
اللى بتعمل (بورنو) ف الفضائيه
أوعك تقلب
علشان بعد شويه
هيجيبوا الجند الأمريكيه
بتوزع (بونبونى)
لأطفال البصره .
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.